የዘወትር ጸሎት

አዐትብ ገጽየ
አዐትብ ገጽየ ወኩለንታየ በትእምርተ መስቀል።በስመ አብ ወወልድ ወመንፈስ ቅዱስ አሓዱ አምላክ በቅድስት ሥላሴ እንዘ አአምን ወእትመኅፀን እክሕደከ ሰይጣን በቅድመ ዛቲ እምየ ቅድስት ቤተ ክርስትያን እንተ ይእቲ ስምዕየ ማርያም ጽዮን ለዓለም ዓለም።
ነአኩተከ እግዚኦ ወንሴብሐከ።ንባርከከ እግዚኦ ወንትአመነከ ንስእለከ እግዚኦ ወናስተበቍዓከ።ንገኒ ለከ እግዚኦ ወንትቀነይ ለስምከ ቅዱስ።ንሰግድ ለከ ኦ ዘለከ ይሰግድ ኩሉ ብርክ ወለከ ይትቀነይ ኩሉ ልሳን።አንተ ዉእቱ አምላከ አማልክት፡ ወእግዚአ አጋእዝት፡ወንጉሠ ነገሥት፡ አምላክ አንተ ለኩሉ ዘሥጋ ወለኩላ ዘነፍስ፡ወንጼዉዓከ በከመ መሃረነ ቅዱስ ወልድከ እንዘ ይብል አንትሙሰ ሶበ ትጼልዩ ከመዝ በሉ
አቡነ ዘበሰማያት
አቡነ ዘበሰማያት ይትቀደስ ስምከ፤ትምጻእ መንግሥትከ ወይኩን ፈቃድከ በከመ በሰማይ ከማሁ በምድር ፡ሲሳየነ ዘለለ ዕለተነ ኀበነ ዮም።ኅድግ ለነ አበሳነ ወጌጋየነ ከመ ንሕነኒ ንኅድግ ለዘአበሰ ለነ።ኢታብአነ እግዚኦ ውስተ መንሱት።አላ አድኅነነ ወባልሐነ እምኩሉ እኩይ፡እስመ ዚአከ ይእቲ መንግሥት ኃይል ወስብሐት ለዓለም ዓለም። አሜን
በሰላም ቅዱስ ገብርኤል መልአክ ኦ እግዝእትየ ማርያም ሰላም ለኪ።ድንግል በሕሊናኪ ወድንግል በሥጋኪ።እመ እግዚአብሔር ጸባዖት ሰላም ለኪ።ቡርክት አንቲ እምአንስት ወቡሩክ ፍሬ ከርሥኪ። ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ። ሰአሊ ወጸልዪ ለነ ኅበ ፍቁር ወልድኪ ኢየሱስ ክርስቶስ ከመ ይሥረይ ለነ ኃጣዉኢነ::
ጸሎት ሃይማኖት።
ነአምን በአሐዱ አምላክ እግአብሔር አብ አኃዜ ኩሉ ገባሬ ሰማያት ወምድር ዘያስተርኢ ወዘኢያስተኢ።ወነአምን በአሐዱ እግዚእ ኢየሱስ ክርስቶስ ወልደ አብ ዋሕድ ዘህልው ምስሌሁ እምቅድመ ይትፈጠር ዓለም። ብርሃን ዘእምብርሃን አምላክ ዘእምአምላክ ዘበአማን።ዘተወልደ ወአኮ ዘተገብረ ዘዑሩይ ምስለ አብ በመለኮቱ። ዘቦቱ ኩሉ ኮነ ወዘእንበሌሁሰ አልቦ ዘኮነ ወኢምንትኒ ዘበሰማይኒ ወዘበምድርኒ። ዘበእንቲአነ ለሰብእ ወበእንተ መድኃኒትነ ወረደ እምሰማያት። ተስብአ ወተሠገወ ወእመንፈስ ቁዱስ ወእማርያም እምቅድስት ድንግል። ኮነ ብእሴ ወተሰቅለ በእንቲአነ በመዋዕለ ጵላጦስ ጴንጤናዊ ሐመ ወሞተ ወተቀብረ ወተንሥ እሙታን አመ ሣልስት ዕለት በከመ ጽሑፍ ዉስተ ቅዱሳት መጻሕፍት።ዐርገ በስብሓት ዉስተ ሰማያት ወነበረ በየማነ አቡሁ፡ ዳግመ ይመጽእ በስብሓት ይኴንን ሕያዋነ ወሙታነ ወአልቦ ማኅለቅት ለመንጉሥቱ።ወነአምን በመንፈስ ቅዱስ እግዚእ ማሕየዊ ዘሰረፀ እም አብ ንሰግድ ሎቱ ወንሰብሖ ምስለ አብ ወወልድ ዘነበበ በነቢያት።ወነአምን በአሐቲ ቅድስት ቤተ ክርስቲያን እንተ ላዕለ ኩሉ ጉባኤ ዘሓዋሪያት፡ ወነአምን በአሓቲ ጥምቀት ለሥርየተ ኃጢአት። ወንሴፎ ትንሣኤ ሙታን ወሕይወት ዘይመጽእ ለዓለመ ዓለም።

ቅዱስ ቅዱስ ቅዱስ እግዚአብሔር ጸባዖት ፍጹም ምሉእ ሰማያት ወምድር ቅድሳተ ስብሓቲከ። ንሰግድ ለከ ክርስቶስ ምስለ አቡከ ኄር ሰማያዊ ወመንፈስከ ቅዱስ ማሕየዊ እስመ መጻእከ ወአኃንከነ።
እሰግድ ለአብ ወወልድ ወመንፈስ ቅዱስ አሓተ ስግደተ/3X/
እንዘ አሓዱ ሠለስቱ ወእንዘ ሠለስቱ አሓዱ ይሤለሱ በአካላት ወይትወሓዱ በመለኮት፣እሰግድ ለእግዝእትነ ማርያም ድንግል ወላዲተ አምላክ፣ እሰግድ ለመስቀለ እግዚእነ ኢየሱስ ክርስቶስ። ዘተቀደሰ በደሙ ክቡር፣ መስቀል ኃይልነ፣ መስቀል ጽንዕነ፣ መስቀል ቤዛነ፣ መስቀል መድሃኒተ ነፍስነ። አይሁድ ክሕዱ። ንሕነሰ አመነ ወእለ አመነ በኃይለ መስቀሉ ድህነ::

ስብሐት ለአብ

ስብሓት ለአብ
ስብሓት ለአብ ስብሓት ለወልድ ስብሓት ለመንፈስ ቅዱስ ፡   ይደልዎም ለአብ ወወልድ ወመንፈስ ቅዱስ ፡
ስብሓት ለአብ ስብሓት ለወልድ ስብሓት ለመንፈስ ቅዱስ ፡   ይደልዎም ለአብ ወወልድ ወመንፈስ ቅዱስ ፡
ስብሓት ለእግዝእትነ ማርያም ድንግል ወላዲተ አምላክ   ፡     ይደልዋ ለእግዝትነ ማርያም ወላዲተ አምላኽ
ስብሓት ለመስቀለ እግዚእነ ኢየሱስ ክርስቶስ            ፡           ይደልዎ ለመስቀለ ኢየሱስ ክርስቶስ
ክርስቶስ በምሕረቱ ይዘክረነ            አሜን
አመ ዳግመ ምጽአቱ ኢያስትኃፈረነ   አሜን
ለሰብሖተ ስሙ ያንቅሓነ                   አሜን
ወበአምልኮቱ ያጽነአነ                      አሜን
እግዝእትነ ማርያም ድንግል ውላዲተ አምላክ አእርጊ ጸሎትነ   አሜን
ወአስተስርዪ ኩሎ ኃጢአተነ          አሜን
ቅድመ መንበሩ ለእግዚእነ             አሜን
ለዘአብልአነ ዘንተ ኅብስተ              እስመ ለዓለም ምሕረቱ
ወለአዝተየነ ዘንተ ጽዋዐ                እስመ ለዓለም ምሕረቱ
ወለዘሠርዐ ለነ ሲሳየነ ወዐራዘነ       እስመ ለዓለም ምሕረቱ
ወለዘተዓገሰ ለነ ኩሎ ኃጢአተነ       እስመ ለዓለም ምሕረቱ
ወለዘወሀበነ ሥጋሁ ቅዱሰ ወደሞ ክቡረ   እስመ ለዓለም ምሕረቱ
ወለዘአብጽሓነ እስከ ዛቲ ሰዓት።             እስመ ለዓለም ምሕረቱ
ነሀብ ሎቱ ስብሓተ ወአኰቴተ ለእግዚአብሔር ልዑል ወለወላዲቱ ድንግል ወለመስቀሉ ክቡር ይትአኰት ወይሰባሕ ስሙ ለእዚአብሔር ወትረ በኵሉ ጊዜ ወበኩሉ ሰዓት።
ጸሎት እግዝእትነ
ጸሎት እግዝእትነ ማርያም ድንግል ወላዲተ አምላክ።ታዐብዮ ነብስየ ለእግዚአብሔር። ወትትኃሠይ መንፈስየ በአምላኪየ ወመድኃንየ፤ እስመርእየ ሕማማ ለአመቱ።ናሁ እምይእዜሰ ያስተበፅዑኒ ኩሉ ትዉልድ። እስመ ገብረ ሊተ ኃይለ ዐቢያተ ወቅዱስ ስሙ። ወሣህሉኒ ለትውልድ ትዉልድ ለእለ ይፈርህዎ።ወገብረ ኃይለ በመዝራዕቱ፡ ወዘረዎሙ ለእለ ያዐብዩ ሕሊና ልቦም፡ ወነሠቶሙ ለኃያላን እመ ናብርቲሆሙ። አዕበዩሙ ለትሑታን፡ ወአጽገቦም እምበረከቱ ለርኁባን፡ ወፈነዎሙ ዕራቆሙ ለብዑላን ወተወክፎ ለእስራኤል ቍልዔሁ፡ ወተዘከረ ሣህሎ ዘይቤሎሙ ለአበዊነ ለአብርሃም ወለዘርኡ እስከ ለዓለም ስብሓት ለአብ ወወልድ ወመንፈስ ቅዱስ፡ ለዓለም ወለ ዓለመ ዓለም አሜን።

ውዳሴ ማርያም የሰኑይ

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።

ዉዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ሰኑይ።
ፈቀደ እግዚእ ያግዕዞ ለአዳም ኅዙነ ወትኩዘ ልብ ወያግብኦ ኅበ ዘትካት መንበሩ፡ ሰአሊ ለነ ቅድስት።
ሠረቀ በሥጋ እምድንግል ዘእንበለ ዘርአ ብእሲ ወአድኃነነ።ለሔዋን እንተ አስሓተ ከይሲ ፈትሓ ላዕሌሃ እግዚአብሔር እንዘ ይብል ብዙኃ አበዝኆ ለሕማምኪ ወለፃርኪ፡ ሠምረ ልቡ ኃበ ፍቅረ ሰብእ ወአግዐዛ፡ ሰአሊ ለነ ቅድስት።
ኢየሱስ ክርስቶስ ቃል ዘተሰብአ ወኃደረ ላዕሌነ ወርኢነ ስብሓቱሁ ከመ ስብሕተ አሕዱ ዋሕድ ለአቡሁ ሠምረ ይሣሃለነ፡ ሰአሊ ለነ ቅድስት።
ርእየ ኢሳይያስ ነቢይ በመንፈስ ትንቢት ምሥጢሮ ለአማኑኤል ወበእንተዝ ጸርሐ እንዘ ይብል ሕፃን ተወልደ ለነ፡ ወልድ ተዉህበ ለነ፡ ሰአሊ ለን ቅድስት።
ተፈሣሕ ወተኃሠይ ኦ ዘመደ ዕጓለ እምሕያው እሰመ አፍቀሮ እግዚአብሔር ለዓለም፡ ወመጠወ ወልድ ዋሕደ ከመ ይሕየዉ ኩሉ ዘየአምን ቦቱ እሰከ ለዓለም፡ ፈነወ ለነ መዝራዕቶ ልዑል፡ ሰአሊ ለነ ቅድስት።
ዘሀሎ ወይሄሉ ዘመጽአ ወካዕበ ይምጽእ ኢየሱስ ክርስቶስ ቃል ዘተሰብአ ዘእንበለ ዉላጤ፡ ኮነ ፍጹም ሰብአ፡ ኢተወልደ ወኢተፈልጠ በኩሉ ግብሩ ወልድ ዋሕድ፡አላ አሓዱ ራእይ፡ ወአሐዱ ህላዌ ወአሐዱ መለኮት ዘእግዚአብሔር ቃል፡ ሰአሊ ለነ ቅድስት።
ተፈሥሒ ኦ ቤተ ልሔም ሀገሮሙ ለነብያት እስመ በኃቤኪ ተወልደ ክርስቶስ ዳግማይ አዳም ከመ ያግብኦ ለአዳም ቀዳሚ ብእሲ እምድር ዉስተ ገነት ይሥዐር ፍትሐ ሞት፡ ኦ አዳም መሬት አንተ ወትገብእ ዉስተ መሬት፡ ኅበ ሀለወት ብዝኅት ኃጢአት በህየ ትበዝኅ ጸጋ እግዚአብሔር፡ ሰአሊ ለነ ቅድስት።
ትትፌሣሕ ወትትሓሠይ ኩሉ ነፍስተ ሰብእ፡ ምስለ መላእክት ይሰብሕዎ ለክርስቶስ ንጉስ ይጸርሑ ወይበሉ ስብሓት ለእግዚአብሔር በሰማያት፡ ወሰላም በምድር ሥምረቱ ለሰብእ፡ እሰመ ሠዐረ ዘትካት ወነሠተ ምክሮ ለጸላኢ፡ ወሠጠጠ መጽሐፈ ዕዳሆሙ ለአዳም ወለሔዋን፡ ወረሰዮሙ አግዐዝያነ ዘተወልደ ለነ በሀገረ ዳዊት መድኃኒነ ኢየሱስ ክርስቶስ፡ ሰአሊ ለነ ቅድስት።
ብርሃን ዘበአማን ዘያበርህ ለኩሉ ሰብእ ለእለ ይነብሩ ዉስተ ዓለም፡በእንተ ፍቅረ ሰብእ መጸእከ ዉስተ ዓለም ወኩሉ ፍጥረት ተፈሥሐ በምጽአትከ፡ እስመ አድኃንኮ ለአዳም እምስሕተት፡ ወረሰይካ ለሔዋን አግዓዚተ እምፃዕረ ሞት ወወሀብከነ መንፈስ ልደት፡ ባረክናከ ምስለ መላእቲከ፡ ሰአሊ ለነ ቅድስት።

ውዳሴ ማርያም ሰሰሉስ

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።

ዉዳሴሃ ለእግዝእትነ ማርያም ድንግል ወላዲተ አምላክ ዘይትነበብ ብ በዕለተ ሠሉስ።
እክሊለ ምክሕነ ወቀዳሚተ መድኃኒትነ ወመሰረተ ንጽሕነ ኮነ በማርያም ድንግል፡ እንተ ወለደት ለነ እግዚአብሔር ቃለ፡ ዘኮነ ሰብአ በእንተ መድኃኒትነ፡ እምድኃረ ኮነ ሰብአ ጥዩቀ አምላክ ፍጹም ዉእቱ፡ ወበእንተዘ ወለደቶ እንዘ ደንግል ይእቲ መንክር ኃይለ ወሊዶታ ዘኢይትነብር፡ ሰአሊ ለነ ቅድስት።
እስመ በፈቃዱ ወበስምረተ አቡሁ፡ ወመንፈስ ቅዱስ መጽአ ወአድኃነነ። ዓቢይ ዉእቱ ስብሐተ ድንግልናኪ ኦ ማርያም ድንግል ፍጽምት፡ ረከብኪ ሞገስ እግዚአብሔር ምስለኪ፡ አንቲ ዉእቱ ስዋስዉ ዘርእያ ያዕቆብ እምድር ዘይበጽሕ እስከ ሰማይ፡ ወመላክተ እግዚአብሔር የዐርጉ ወይወርዱ ዉስቴታ፡ ሰአለ ለነ ቅድስት።
አንቲ ውእቱ ዕጽ ዘርእየ ሙሴ በነደ እሳት ወኢትውኢ፣ ዘውእቱ ወልደ እግዚአብሔር መጽአ ወሃደረ ውስተ ከርሥኪ፣ ወእሳተ መለኮቱ ኢያውዓየ ሥጋኪ፣ ሰአሊ ለነ ቅድስት።
አንቲ ዉእቱ ገራህት ዘኢተዘርአ ዉስቴታ ዘርእ፡ ወፅአ እምኔኪ ፍሬ ሕይወት፡ አንቲ ዉእቲ መዝገብ ዘተሣየጠ ዮሴፍ፡ ወረከበ በዉስቴታ ባሕርየ ዕንቁ ክብረ፡ ዘዉእቱ መድኃኒነ ኢየሱስ ክርስቶስ ተፀዉረ በከርሥኪ ወወለድሊዮ ዉስተ ዓለም፡ ሰአሊ ለነ ቅድስት።
ተፈሥሒ ኦ ወላዲተ እግዚእ ኃሤቶም ለመላእክት፡ ተፈሥሒ ኦ ንጽሕት ዜናሆሙ ለነብያት፡ ተፈሥሒ እስመ ረከብኪ ሞገሰ እግዚአብሔር ምስለኪ፡ ተፈሥሒ እስመ ተወከፍኪ ቃሎ ለመልአክ ፍስሐ ኩሉ ዓለም፡ ተፈሥሒ ኦ ወላዲተ ፈጣሬ ዓለም፡ ሰአሊ ለነ ቅድስት።
ተፈሥሒ እስመ ድልወ ተሰመይኪ፣ ኦ ወላዲተ አምላክ፡ ተፈሥሒ ኦ መድኃኒታ ለሔዋን ተፈሥሒ እንተ አጥበውኪ ሓሊበ ለዘይሰስዮ ለኩሉ ፍጥረት፣ ተፈሥሒ ኦ ቅድስት እሞሙ ለኩሎሙ ሕያዋን፣ ናንቅዐዱ ኅቤኪ ትስአል በእንቲአነ ሰአሊ ለነ ቅድስት።
ኦ ድንግል ኦ ቅድስት፡ ኦ ወላዲተ እግዚእ፡ እስመ ወለድኪ ለነ ንጉሥ፡ መንክር ምሥጥር ኃደረ ላዕሌኪ ለመድኃኒተ ዚአነ።ናርምም እስመ ኢንክል ፈስሞ ጥንቁቀ ነጊረ፡ በእንተ ዕበዩ ለዉእቱ ገባሬ ሠናያት በብዙኃ መንከሩ ራእይ፡ ሰአሊ ለነ ቅድስት።
ቃለ አብ ሕያዉ ዘወረደ ዉስተ ደብረ ሲና ወወሀበ ሕገ ለሙሴ፡ ወከደነ ርእሰ ደብር በጊሜ ወጢስ ወጽልመት ወነፍስ፡ ወበድምፀ ቃለ አቅርንት ይጌሥፅ ለእለ ይቀዉሙ በፍርሃት፡ ሰአሊ ለነ ቅድስት።
ዉእቱኬ ዘወረደ ኅቤኪ፡ ኦ ደብር ነባቢት በትሕትና መፍቀሬ ሰብእ፡ ተሰብአ እምኔኪ ዘእንበለ ዉላጤ ፍጹመ ሥጋ ነባቢ ዘከማነ፡ በመንፈስ ጥበብ አምላክ ኃደረ ላዕሌሃ፡ ኮነ ፍጹም ስብአ ከመ ያድኅኖ ወይሥረይ ኃጢአቶ ለአዳም፡ ወያንብሮ ዉስተ ሰማያት ወያግብኦ ኅበ ዘትካት መንበሩ፡ በዕበይ ሣህሉ ወምሕረቱ። ሰአሊ ለነ ቅድስት።
ዕበያ ለድንግል ኢይትከሃል ለተነግሮ እስመ እግዚእ ኃረያ፡ መጽአ ወኃደረ ላዕሌሃ ዘየኃድር ዉስተ ብርሃን ኅበ አልቦ ዘይቀርቦ ተፀዉረ በከርሣ ፱ ተ አዉራኃ ዘኢይትረአይ ወዘኢትዓወቅ ወለደቶ ማርያም እንዘ ድንግል ይእቲ፡ ሰአሊ ለነ ቅድስት።
ዘዉእቱ እብን ዘርእየ ዳኒኤል ነብይ፡ ዘተበትከ እምደብር ነዋኅ ዘእንበለ፡ እድ፡ ዘዉእቱ ቃል ዘወፀአ እምኅበ አብ መጽእ ወተሰብአ እምድንግል ዘእንበለ ዘርአ ብእሲ ወአድኃነነ፡ ሰአሊ ለነ ቅድስት።
ኮንኪ ዓፅቀ ንጹሕ ወሙዳየ አሚን፡ ርትዕት ሃይማንኖቶሙ ለቅዱሳን አበዊነ፡ ኦ ንጽሕት ወላዲተ አምላክ ድንግል ኅትምት ወለድኪ ለነ ቃለአብ ኢየሱስ ክርስቶስ መጽአ ለመድኃኒትነ፡ ሰአሊ ለነ ቅድስት።
አንቲ እሙ ለብርሃን ክብርት ወላዲት እግዚእ እንተ ተርእየ ለቃል ዘኢይትረአይ፡ እምድኅረ ወለድኪ ኪያሁ ነበርኪ በድንግልና፡ በስብሐት ወበባርኮት ያዐብዩኪ፡ ሰአሊ ለነ ቅድስት።
አይ ልሳን ዘይክል ነቢበ ዘይት ነገር በእንቲአኪ ኦ ድንግል ንጽሕት እሙ ለቃለ አብ ኮንኪ መንበሮ ለንጉሥ ለዘይፀዉርዋ ኪሩቤል፡ ናስተበፅዐኪ ኦ ቡርክት፡ወንዘክር ስምኪ በኩሉ ትዉልድ ትዉልድ ኦ ርግብ ሠናይት እሙ ለእግዚእነ ኢየሱስ ክርስቶስ፡ ሰአሊ ለነ ቅድስት።
ተፈሥሒ ኦ ማርያም እም ወአመት፡ እሰመ ለዘዉስተ ሕፅንኪ ይሰብሕዎ መላእክት ወኪሩቤል ይሰግዳ ሎቱ በፍርሃት፡ ወሱራፌል ዘእንበለ ጽርዓት ይሰፍሑ ክነፈሆሙ ወይበሉ፡ ዝንቱ ዉእቱ ንጉሠ ሰብሐት መጽእ ይሥረይ ኃጢአተ ዓለም በዕበየ ሣህሉ ፡ሰአሊ ለነ ቅድስት::

ዉዳሴ ማርያም ዘረቡዕ

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።

ዉዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ረቡዕ።
ኩሉ ሠራዊተ ሰማያት ይብሉ ብፅዕት አንቲ ሰማይ ዳግሚት ዲበ ምድር ኆኅተ ምሥራቅ ማርያም ድንግል ከብካብ ንጹሕ ወመርዓ ቅዱስ፡ ነፀረ አብ እምሰማይ ወኢረከበ ዘከማኪ፡ ፈነወ ለነ ዋሕዶ ወተሰብአ እምኔኪ፡ ሰአሊ ለነ ቅድስት።
         ኩሉ ትዉልድ ያስተበፅዑኪ ለኪ ለባሕትትኪ ኦ እግዝእትነ ወላዲተ አምላክ። ተነበዩ ላዕሌኪ ዐቢያተ ወመንክራተ፡ ኦ ሀገረ እግዚአብሔር እስከ ኮንኪ አንቲ ማኅደረ ለፍሡሐን፡ ኩሎሙ ነገስተ ምድር የሐዉሩ በብርሃንኪ ወአሕዛብኒ በፀዳልኪ ኦ ማርያም ኩሉ ትዉልድ ያስተበፅዑኪ ወይሰግዱ ለዘተወልደ እምኔኪ ወያዐብዩዎ፡ ሰአሊ ለነ ቅድስት።
         አንቲ ዘበአማን ደመና እንተ አስተርአይኪ ለነ ማየ ዝናም፡ ትእምርተ ዋሕዱ ረሰየኪ አብ መንፈስ ቅዱስ ኅደረ ላዕለኪ ወኃይለ ልዑል ጸለለኪ፡ ኦ ማርያም አማን ወልድኪ ቃለ ወልደ አብ ዘይነብር ለዓለም መጽአ ወአድኃነነ እምኃጢአት፡ ዓብይ ዉእቱ ክብር ዘተዉህበ ለከ ኦ ገብርኤል መልአክ፡ ዜናዊ ፍሡሐ ገጽ፡ ሰበከ ለነ ልደተ እግዚእ ዘመጽአ ኃቤነ፡ ወአብሠርካ ለማርያም ድንግል ዘእንበለ ርስሐት፡ ወትቤላ ተፈሥሒ ኦ ምልእተ ጸጋ እግዚአብሔር ምስለኪ፡ ሰአሊ ለነ ቅድስት።
ረከብኪ ጸጋ መንፈስ ቅዱስ ኃደረ ላዕሌኪ ወኃይለ ልዑል ጸለለኪ፡ ኦ ማርያም አማን ወለኪ ቅዱስ መድኅኑ ለኩሉ ዓለም፡ መጽአ ወአድኃነነ፡   ሰአሊ ለነ ቅድስት።
ግብረ ድንግል ይሴብሕ ልሳንነ፡ ዮም ንወድሳ ለማርያም ወላዲተ አምላክ፡ በእንተ ዘተወልደ እምኔሃ በሀገረ ዳዊት እግዚእነ ወመድኃኒነ ኢየሱስ ክርስቶስ ንዑ ኩልክሙ አሕዛብ ናስተብፅዓ ለማርያም እስመ ኮነት እመ ድንግል ወፅሙረ ተፈሥሒ ኦ ድንግል ንጽሕት እንተ አልባቲ ርኩስ፡ ዘመጸ ቃለ አብ ወተሰብአ እምኔሃ። ተፈሥሒ ኦ ሙዳይ እንተ አልቦቲ ነዉር ፍጽምት ዘአልቦ ርስሐት፡ ተፈሥሒ ኦ ገነት ነባቢት ማኅደሩ ለክርስቶስ ዘኮነ ዳግማይ አዳም በእንተ አዳም ቅዳሚ ብእሲ፡ተፈሥሒ ኦ ፀዋሪቱ ለዋሕድ ለዘኢ ተፈልጠ እምኅፅነ አቡሁ፡ ተፈሥሒ ኦ ከብካብ ንጹሕ ሥርግዉ በኩሉ ሥነ ስብሐት፡ መጽአ ወተሰብአ እምኔኪ፡ ተፈሥሒ ኦ ዕፀ ጰጦስ እንተ ኢያዉዓያ መለኮት ተፈሥሒ ኦ አመት ወእም ድንግል ወሰማይ ሰማያዌ እንተ ፆረት በሥጋ ዘይፄዐን ዲበ ኩሩቤል፡ ወበእንተዝ ንትፈሥሕ ወንዘምር ምስለ መላእክት ቅዱሳን ብፍሥሓ ወበኅሤት፡ ወንበል ስብሐት ለእግዚአብሔር በሰማያት ወሰላም በምድር ሥምረቱ ለሰብእ፡ እስመ ኪያኪ ሠምረ ዘሎቱ ክብር ወሰብሐት፡ ሰአሊ ለነ ቅድስት።
የዐቢ ክብራ ለማርያም እምኩሎም ቅዱሳን እስመ ድልወ ኮነት ለተወክፎ ቃለ አብ ዘይፈርህዎ መላእክት ወየኩትዎ ትጉሃን በሰማያት፡ ፆረቶ ማርያም ድንግል በከርሣ፡ ይእቲ ተዐቢ እምኪሩቤል ወትፈደፍድ እምሱራፌል፡ እስመ ኮነት ታቦት ለሐዱ ዘእምቅድስት ሥላሴ ዛቲ ይእቲ ኢየሩሳሌም ሀገሮሙ ለነብያት ወማኅደረ ፍሥሐሆመ ለኩሎም ቅዱሳን፡ ሕዝብ ዘይነብር ዉስተ ጽልመት ወጽላሎተ ሞት ብርሃን ዐቢይ ሰረቀ ላዕሌሎሙ፡ እግዚአብሔር ዘየዐርፍ በቅዱአስኒሁ ተሰብአ እምድንግል ለመድኃኒተ ዚአነ፡ ንዑ ርእዩ ዘንተ መንክር ወዘምሮ ዘምሩ በእንተ ምሥጢር ዘተከሥተ ለነ፡ እስመ ዘኢይሰባእ ተሰብአ ቅል ተደመረ ወዘአልቦ ጥንት ኮነ ቅድመ፡ ወለዘአልቦ መዋዕል ኮነ ሎቱ መዋዕል፡ ዘኢይትዐወቅ ተከስተ ወኢይትረአይ ተራእየ ወልድ እግዚአብሔር ሕያዉ ጥዩቀ ኮነ ሰብአ፡ ኢየሱስ ክርስቶስ ዘትማልም ወዮም፡ ወክመ ዉእቱ እስከ ለዓለም አሓዱ ህላዌ ሎቱ ንስግድ ወንሰብሕ፡ ሰአሊ ለነ ቅድስት።
ሕዝቅኤል ነቢይ ኮነ ስምዐ በእንቲአሃ፡ ወይቤ ርኢኩ ኆኅተ በምስራቅ ኅቱም በዐቢይ መንክር ማኅተም፡ አልቦ ዘቦአ ዘእንበለ እግዚአብሔር ኃያላን፡ ቦአ ዉስቴታ ወወዕአ ሰአሊ ለነ ቅድስት።
ኆኅትሰ ድንግል ይእቲ እንተ ወለድት ለነ መድኃነ እምድኅረ ወለደት ኪያሁ ነበረት በድንግልና ከመትካት፡ ቡሩክ ዉእቱ ፍሬ ከርሥኪ ኦ ወላዲተ እግዚእ፡ ዘመጽአ ወአድኃነነ እምእድ ጸላኢ ዘአልቦ ምሕረት፡ አንቲ ፍጽምት ወቡርክት ረከብኪ ሞገሰ በኅበ ንጉሠ ስብሐት አምላክ ዘበአማን ለኪ ይደሉ ዕበይ ወክብር እምኩሎሙ እለ ይነብሩ ዲበ ምድር፡ ቃለ አብ መጽአ ወተሰብአ እምኔኪ ወአንሶሰወ ምስለ ሰብእ፡ እስመ መሕረ ዉእቱ ወመፍቀሬ ሰብእ አድኃነ ንፍሳቲነ በምጽአቱ ቅዱስ   ሰአሊ ለነ ቅድስት ::

ውዳሴ ማርያም ዘሐሙስ

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።
ዉድሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ኃሙስ
     ዕፀ እንተ ርእየ ሙሴ በነደ እሳት ዉስተ ገዳም ወአዕፁቂሃ ኢትዉዒ፡ ትመስል ማርያም ድንግል ዘእንበለ ሩኩስ ተሰብአ እማኔሃ ቃለ አብ፡ ወኢያዉዐያ እሳት መለኮቱ ለድንግል፡ እምድኅረ ውለደቶ ድንግልናሃ ተረክበ፡ ወመለኮቱ ኢተወለጠ ኮነ ወልደ ዕጓለ እምሕያዉ አምላክ ዘበአማን መጽአ ወአድኃነነ፡ ሰአሊ ለነ ቅድስት።
     ናዐብየኪ ኩልነ ኦ እግዝእትነ ወላዲተ አምላክ እስመ ሣህልኪ ይኩን ላዕለ ኩልነ። ትምክሕተ ኩልነ ድንግል ማርያም ወላዲተ አምላክ ዘበእንቲአሃ ተሥዕረ ዘቀዳሚ መርገም እንተ ኃደረት ዲበ ዘመድነ፡ በዕልወት ዘገበረት ብእሲት በልዐት እምዕፅ፡ ወበእንተ ሔዋን ተዐፅወ ኆኅተ ገነት፡ ወበእንተ ማርያም ድንግል ተርኅወ ለነ ዳግመ፡ ከፈለነ ንብላዕ እምዕፀ ሕይወት፡ ዘዉእቱ ሥጋሁ ለክርስቶስ ወደሙ ክቡር፡ በእንተ ፍቅረ ዚአነ መጸ ወአድኃነአነ፡ አይ ልቡና፡ ወአይ ነቢብ፡ ወአይ ሰሚዕ፡ ዘይክል አእምሮ ዝንቱ ምሥጢር መንክራተ ዘይትነበብ ላዕሌሃ፡ እግዚአብሔር መፍቀሬ ሰብእ ፩ዱ ዉእቱ ባሕቲቱ ቃለ አብ ዘሀሎ እምቅድመ ዓለም በመለኮቱ፡ እንበለ ሙስና እም፩ዱ አብ መጽአ ወተሰብአ ወልድ ዋሕድ እምቅድስት እሙ፡ እምድኅረ ወለደቶ ኢማሰነ ድንግልናሃ፡ ወበእንተዝ ግህደ ኮነት ከመ ወላዲተ አምላክ ይእቲ፡ ኦ ዕሙቅ ብዕለ ጥበቡ ለእግዘአብሔር ከርሥ ዘፈትሐ ላዕሌሃ ትለድ በፃዕር ወሕማም ወኃዘነ ልብ፡ወኮነት ፈልፈለ ሕይወት ወወለደት ዘእንበለ ዘርአ ብእሲ ዘይስዕር መርገመ እምዘመድነ። ወበእንተዝ ንስብሖ እንዘ ንብል ስብሕት ለከ ኦ መፍቀሬ ሰብእ ኄር ንፍሳቲነ፡ ሰእለ ለነ ቅድስት።
      ኦ ዝ መንክር ወዕፁብ ኃይል ከርሣ ለድንግል ወላዲተ አምላክ ዘእንበለ ዘርእ ስምዐ ኮነ መልአክ ዘአስተርአዮ ለዮሰፍ እንዘ ይብል ከመዝ፡ እስመ ዘትወለድ እምኔሃ እመንፈስ ቅዱስ ቃለ እግዚአብሔር ዉእቱ ተሰብአ ዘእምበለ ዉላጤ፡ ወለደቶ ማርያም ምክዕቢተ ዝንቱ ፍሥሓ፡ ወይቤ ትወልዲ ወልደ ወይሰመይ አማኑኤል ዘበትርጓሜኡ እግዚአብሔር ምስሌነ፡ ወዓዲ ይስመይ ኢየሱስሃ ዘይድኅኖም ለሕዝቡ እምኃጢአቶም ያድኅነነ በኃይሉ ወይሥረይ ኃትጥያትነ እስመ ጥዩቀ አእምርናሁ ከመ አምላክ ዉእቱ፡ ዘኮነ ሰብአ ሎቱ ስብሐት እስከ ለዓለም፡ኦዝ መንክር ልድተ አምላክ እማርያም እምቅድስት ድንግል፡ አግመረቶ ለቃል ኢቀደሞ ዘርእ ለለደቱ ወኢአማሰነ በልደቱ ድንግልናሃ፡ እምኅበ ወፅአ ቃል ዘንበለ ድካም፡ ወእምድንግል ተወልደ ዘእምበለ ሕማም፡ ሎቱ ሰገዱ ሰብአ ሰገል፡ አምጽኡ ዕጣነ ከመ አምላክ ዉእቱ፡ ወርቀ እስመ ንጉሥ ዉእቱ፡ ወከርቤ ዘይትወሀብ ለሞቱ ማሕየዊ በእንቲአነ ተወክፈ በፈቃዱ፡ ፩ዱ ዉእቱ ባሕቲቱ ኄር ወመፍቀሬ ሰብእ፡ ሰአሊ ለነ ቅድስት።
     ኦ ዝ መንክር ነሥእ ፩ድ ዐፅመ እምገቦሁ ለአዳም ወለሐኮ እምኔሁ ብእሲተ ወኩሎ ፍጥረተ Ꮆለ እመሕያዉ፡ ተዉህበ እግዚእ ቃለ አብ ተሰብአ እምቅድስት ድንግል ወተሰምየ አማኑኤል ወበእንተዝ ንስአል ኅቤሃ ኩሎ ጊዜ ከመ ታስተሥር በእንቲአነ ፍቅር ወልዳ፡ ዔርት ይእቲ በኅበ ኩሎሙ ቅዱሳን ወሊቃነ ጳጳሳት እስመ አምጸት ሎሙ ዘኪያኡ ይጸንሑ፡ ወለነብ ኢያትኒ አምጽአትሎሙ ለዘበእንቲአሁ ተነበይኡ፡ ወለሐ ዋርያትኒ ወለደት ሎሙ ዘሰበኩ በሱም ዉስተ ኩሉ አጽናፈ ዓለም፡ ለሰማዕት ወለመሃይማን ወፅአ እምኔሃ ዘተጋደሉ በእንቲአሁ ኢየሱስ ክርስቶስ ብዕለ ጸጋ ጥበቡ ዘኢይትዐወቀ፡ንኅሥሥ ዕበየ ሣህሉ ስጽአ ወአድኃነነ፡ ስአሊ ለነ ቅድስት።
    መሐለ እግዚአብሔር ለዳዊት በጽድቅ ወኢይኔስሕ፡ እስመ እምፍሬ ከርሥከ አነብር ዲበመንበርከ፡ወሶበ ተወክፎ ዉእቱ ጽድቅ ከመ እምኔሁ ይትወለድ ክርስቶስ በሥጋ፡ ፈቀደ ይኅሥስ ወይርከብ ማኅደሮ ለእግዚአብሔር ቃል ወፈጸመ ዘንተ በዐቢይ ትጋህ፡ ወእምዝ ጸርሐ በመንፈስ ወይቤ፡ ናሁ ሰማዕናሁ በኤፍራታ ወማኅደሮ ለአምላክ ያዕቆብ፡ እንተ ይእቲ ቤተ ልሔም ዘኅረያ አማኒኤል ይትወለድ ዉስቴታ በሥጋ ለመድኃኒተ ዚአነ፡ ካዕበ ይቤላ ካልእ እምነብያት ወአንቲኒ ቤተ ልሔም ምድረ ኤፍራታ ኢትቴሐቲ እምነገሥተ ይሁዳ፡ እስመ እምኔኪ ይወፅእ ንጉሥ ዘይርዕዮሙ ለሕዝብየ እስራኤል፡ ኦዝ ነገር ለእሉ እለ ተነበዩ ዘበአሃዱ መንፈስ በእንተ ክርስቶስ ሎቱ ስብሓት፡ ምስለ ኄር አብሁ፡ ወመንፈስ ቅዱስ እምይእዜ ወእስከ ለዓለም፡ ሰአሊ ለነ ቅድስት።
    ዳዊት ዘነግሠ ለእስራኤል አመይትነሥኡ ላዕሌሁ ዕልዋን። ፈትወ ይስተይ ማየ እምዓዘቅተ ቤተ ልሔም፡ ፍጡነ ተንሥኡ መላሕቅተ ሐራሁ ወተቃተሉ በዉስተ ትዕይንተ ዕልዋን፡ ወአምጽኡ ሎቱ ዉእተ ማየ ዘፈተወ ይሰተይ፡ወሶበ ርእየ ዉእቱ ጻድቅ ከመ አጥብዑ ወመጠዉ ነፍሶሙ ለቀትል በእንቲአሁ፡ ከዐወ ዉእተ ማየ ወኢሰትየ እምኔሁ፡ ወእምዝ ተኈለቈ ሎቱ ጽድቅ እስከ ለዓለም፡ አማን መነኑ ሰማዕት ጣዕማ ለዛ ዓለም ወከዓዉ ደሞሙ በእንተ እግዚአብሔር ወተዐገሡ ሞተ መረረ በእንተ መንግሥተ ሰማያት፡ ተሥሃለነ በከመ ዕበየ ሣህልከ፡ ሰአሊ ለነ ቅድስት።
    አሐዱ ዘእምቅድስት ሥላሴ፤ ርእዮ ትሕትናነ አጽነነ ሰማየ ሰማያት፡ መጽአ ወኅደረ ዉስተ ከርሠ ድንግል፡ ወኮነ ሰብአ ከማነ ዘእንበለ ኃጢአት ባሕቲታ፡ ወተወልደ በቤተ ልሔም በከመ ሰበኩ ነቢያት፡ አድኃነነ ወቤዘወነ ወረስየነ ሕዝበ ዚአሁ፡ ሰአሊ ለነ ቅድስት።

ውዳሴ ማርያም ዘዓርብ

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።

ውዳሴሃ ለእግዝእትነ ማርያም ድንግል ወላዲተ አምላክ ዘይትነብ በዕለተ ዓርብ።
    ቡርክት አንቲ እምአንስት ወቡሩክ ፍሬ ከርሥኪ፡ ኦ ማርያም ድንግል ወላዲተ አምላክ ዘእንበለ ርኩስ ሠረቀ ለነ እምነኪ ፀሐየ ጽድቅ፡ ወአቅረበነ ታሕተ ክነፍሁ እስመ ዉእቱ ፈጠረነ፡ ሰአሊ ለነ ቅድስት።
   ለኪ ለባሕቲትኪ ኦ እግዚእትነ ወላድዲተ አምላክ እመ ብርሃን አንቲ ናዐብየኪ በስብሐት ወበዉዳሴ።ቡርክት አንቲ ተዐብዪ እምሰማይ ወትከብሪ እምድር ወላዕለ ኩሉ ሕሊናት፡ መኑ ዘይክል ነቢበ ዕበየኪ፡ ወአልቦ ዘይመስል ኪያኪ፡ ኦ ማርያም መላእክት ያዐብዩኪ ወሱራፌል ይሴብሑኪ፡ እስመ ዘይነብር ዲበ ኪሩቤል ወሱራፌል መጽአ ወኅደረ ዉስተ ከርሥኪ፡ መፍቀሬ ሰብእ አቅረበነ ኅቤሁ፡ ዘዚአነ ሞተ ነሥአ ወእንቲአሁ ሕይወተ ወሀበነ፡ ዘሎቱ ክብር ወስብሐት፡ ሰአሊ ለነ ቅድስት።
    ቡርክት እንቲ ማርያም ወቡሩክ ፍረ ከርሥኪ ኦ ድንግል ወልላዲተ አምላክ ምክሖን ለደናግል፡ ዘእምቅድመ ዓለም ህልዉ ተሰብአ እምኔኪ ብሉየ መዋዕል ወፅአ እምከርስኪ ሥጋነ ነሥአ ወመንፈሶ ቅዱስ ወሀበነ፡ ወረሰየነ ዕሩያነ ምስሌሁ በብዝኅ ኂሩቱ፡ አንቲ ተዐብዩ እምብዙኃት አንስት እለ ነሥአ ጸጋ ወክብረ፡ ኦ ማርያም ወላዲተ አምላክ ሀገር መንፈሳዊት ዘኅደረ ላዕሌሃ እግዚአብሔር ልዕል፡ እስመ ዘይነብር ዲበ ኪሩቤል ወሱራፌል በእራኅኪ ሐቀፍኪዮ፡ ወዘይሴሲ ለኩሉ ዘሥጋ በብዝኃ ኂሩቱ አኅዘ አጥባተኪ ወጠበወ ሐሊበ፡ ዘዉእቱ አምላክነ መድኃኔ ኩሉ ይርዕየነ እስከ ለዓለም፡ ንስግድ ሎቱ ወስብሖ እስመ ዉእቱ ፈጠረነ፡ ሰአሊለነ ቅድስት።
    ማርያም ድንግል ሙዳየ ዕፍረት ነቅዐ ፈልፈለ ማየ ሕይወት፡ፍሬ ከርሣ አድኃነ ኩሎ ዓለመ ወሠዐረ እምኔነ መርገመ፡ ወገበረ ሰላመ ማእከሌነ በመስቀሉ ወበትንሣኤሁ ቅድስት፡ አግብኦ ለብእሲ ዳግመ ዉስተ ገነት፡ ሰአሊለነ ቅድስት።
ማርያም ንጽሕት ድንግል ወላዲተ አምላክ ማእምንት፡ ሰአሊተ ምሕረት ለዉሉደ ሰብእ ሰአሊ ለነ ኅበ ክርስቶስ ወልድኪ ይሥረይ ኃጢአተነ፡ ሰአሊ ለነ ቅድስት።
    ማርያም ድንግል ትጸርሕ በቤተ መቅደስ ወትብል የአምር እግዚአብሔር ከመ አልብየ ዝአአምር ባዕድ ወኢምንትኒ ዘእንበለ ድምፀ ቃሉ ለመልአክ ዘአብሠረኒ በክብር፡ ወይበለኒ ሰላም ለኪ ኦ ቅድስት ድንግል፡ ፆርኪ ዘኢይፀወር፡ አግመርኪ ዘይትገመር ወአልቦ ዘያገምሮ ምንትኒ፡ ይበዝኅ ዉዳሴኪ ኦ ምልእተ ጸጋ በኩሉ ክብር፡ እስመ ኮንኪ አንቲ ማሕደረ ቃለ አብ፡አንቲ ዉእቱ መንጦላዕት ስፍህት አንተ ታስተጋብኦሙ ለመሃይምናን ሕዝበ ክርስቲያን ወትሜህሮሙ ሰጊደ ለሥሉስ ማሕየዊ፡ አንቲ ዉእቱ ዘፆርኪ ዓምደ እሳት ዘርእየ ሙሴ ዘዉእቱ ወልደ እግዚአብሔር መጽአ ወኃደረ ዉስተ ከርሥኪ፡ ኮንኪ ታቦቶ ለፈጣሬ ሰማያት ወምድር፡ ጾርኪዮ በከርሥኪ ፱ተ አዉራኃ፡ አንቲ ማእምንት ለዘኢያገምርዎ ሰማያት ወምድር፡ ኮንኪ ተንከተመ ለዕርገት ዉስተ ሰማይ፡ ብርሃንኪ የዐቢ እምብርሃነ ፀሐይ፡ አንቲ ዉእቱ ምስራቅ ዘወፅአ እምኔኪ ኮከብ ብሩህ ዘነፀርዎ ቅድሳን በፍሥሓ ወበኃሤት፡ ዘፍትሐ ላዕለ ሔዋን ትለድ በፃዕር ወሕማም፡ አንቲሰ ማርያም ሰማዕኪ ዘይብል ተፈሥሒ ኦ ምልእተ ጸጋ፡ ወለድኪ ለነ ንጉሠ እግዚአ ኩሉ ፍጥረት መጽአ ወአድኅነነ እስመ መሐሪ ዉእቱ ወመግቀሬ ሰብእ፡ በእንተዝ ንዌድሰኪ በከመ ገብርኤል መልአክ እንዘ ንብል፡ ቡርክት አንቲ ማርያም ወቡሩክ ፍሬ ከርሥኪ ተፈሥሒ ኦ ምልእተ ጸጋ እግዚአብሔር ምስለኪ ሰአሊ ለነ ቅድስት።

ውዳሴ ማርያም ዘቀዳሚት ሰንበት

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።

ዉዳሴሃ ለእግዚእትነ ማርያም ድንግል ወላዲተ አምላክ ዘትነበብ በዕለተ ቀዳሚት።
    ንጽሕት ወብርህት ወቅድስት በኩሉ እንተ ሐቀፈቶ ለእግዚእ በእራኃ ወኩሉ ፍጥረት ይትፌሥሑ ምስሌሃ እንዘ ይጸርሑ ወይበሉ፡ ሰአሊለነ ቅድስት።
    ተፈሲሒ ኦ ምልእተ ጸጋ፡ ተፈሥሒ እስመ ረከብኪ ሞገሰ፡ ተፈሥሒ እግዚአብሔር ምስሌኪ።
ናስተበጽዕ ዕበየኪ ኦ ግርምት ድንግል፡ ወንፌኑ ለኪ ፍሥሐ ምስለ ገብርኤል መልአክ፡ እስመ እምፍሬ ከርሥኪ ኮነ መድኃኒተ ዘመድነ፡ ወአቅረበነ ኅበ እግዚአብሔር አቡሁ፡ ሰአሊ ለነ ቅድስት።
      ከመ ከብካብ ዘአልቦ ጥልቀት፡ መንፈስ ቅዱስ ኅደረ ላዕሌኪ ወኃይለ ልዑል ጸለለኪ፡ ኦ ማርያም አማን ወለድኪ ቃለ ወልድ አብ ዘይነብር ለዓለም መጽአ ወአድኅነነ እምኃጢአት፡ ሰአሊ ለነ ቅድስት።
አንቲ ዉእቱ ዘመድ ዘእምሥርወ ዳዊት ወለድኪ ለነ በሥጋ መድኃኒነ ኢየሱስ ክርስቶስ፡ ዋሕድ ቃል ዘእምአብ ዘእምቅድመ ዓለም ህልዉ፡ ኅብአ ርእሰ ወነሥአ እምኔኪ አርአያ ገብር፡ ሰአሊ ለነ ቅድስት።
      ኮንኪ ዳግሚተ ሰማይ ዲበ ምድር ኦ ወላዲተ አምላክ ዘእምበለ ርኩስ፡ ሠረቀ ለነ እምኔኪ ፀሕየ ጽድቅ፡ ወወለድኪዮ በከመ ትንቢተ ነቢያት ዘእንበለ ዘርእ ወኢሙስና፡ ሰአሊ ለነ ቅድስት።
      አንቲ ዉእቱ ደብተራ እንተ ተሰመይኪ ቅድስተ ቅዱሳን፡ ወውስቴታ ታቦት ጽላተ ኪዳን መሶበ ወርቅ እንተ መና ኅቡእ፡ ዘዉእቱ ወደ እግዚአብሔር መጽአ ወኅደረ ኅበ ማርያም ድንግል፡ ዘእንበለ ርኩስ ተሰብአ እምኔሃ ቃለ አብ ወወለደቶ ዉስተ ዓለም ለንጉሠ ሰብሕት፡ መጽአ ወአድኅነነ፡ ትትፌሣሕ ገነት እመ በግዕ ነባቢ፡ ወልደ አብ ዘይነብር ለዓለም፡ መጽአ ወአድኅነነ እም ኃጢያት፡ ሰአሊ ለነ ቅድስት።
     ተሰመይኪ እመ ለክርስቶስ ንጉስ፡ እምድኅረ ወለድኪ ኪያሁ ነበርኪ በድንግልና በመንክር ምሥጢር ወለድኪዮ ለአማኑኤል፡ ወበእንተዝ ዐቀበኪ እንበለ ሙስና፡ ሰአለ ለነ ቅድስት።
     አንቲ ዉእቱ ሰዋስዉ ዘርእየ ያዕቆብ እግዚአብሔር ላዕሌሁ እስመ ፆአኪ በከርሥኪ ኅቱም ዘኢይትዓወቅ እምኩለሄ፡ ኮንኪ ለነ ሰአሊተ ኅበ እግዚእነ ኢየሱስ ክርስቶስ ዘተሰብአ እምነኪ በእንተ መድኃኒትነ፡ ሰአሊ ለነ ቅድስት።
    ናሁ እግዚእ ወፅአ እምነኪ ኦ ቡርክት ጽርሕ ንጽህት፡ ያድኅን ኩሎ ዓለመ ዘፈጠረ በዕበየ ሣህሉ ንሰብሖ ወንወድሶ እስመ ዉእቱ ኄር ወመፍቀሬ ሰብእ፡ ሰአሊ ለነ ቅድስት::
     ተፈሥሒ ኦ ምልእተ ጸጋ ድንግል ዘእንበለ ርኩስ ልሕኩት ንጽሕት ክብረ ኩሉ ዓለም፡ ብርሃን ዘኢትጠፍእ፡ መቅደስ ዘኢትትነሠት፡ በትረ ሃይማኖት ዘኢትጸንን፡ ምስማኮሙ ለቅዱሳን፡ ሰአሊ ለነ ኅበ ወለድኪ ኄር መድኃኒነ ይምሐረነ ወይሣሃለነ ይሥረይ ኃጢአተነ፡ ሰአሊ ለነ ቅድስት።

ውዳሴ ማርያም ዘሰንበተ ክርስቲያን

ኦ እግዚእትየ ፍትኅኒ እማይሰሩ ለሰይጣን እሙ ለመድኅን ወለተ ብርሃን ባርክኒ ቀድስኒ ወአንፅኅኒ በከመ ባርክዮ ለቅዱስ ኤፍሬም ፍቁረኪ በረከተ ፍቁር ወልድኪ ወአቡሑ ወመንፈስ ቅዱስ ይኅድር በላዕሌየ።

ውዳሴሃ ለእግዝእትነ ማርያም ድንግል ወላዲተ አምላክ ዘይትነበብ በዕለተ ሰንበት ክርስቲያን ቅድስት።
    ተሰመይኪ ፍቅርተ ኦ ቡርክት እምእንስት አንቲ ዉእቱ ዳግሚት ቀመር እንተ ተሰመይ ቅድስተ ቅዱሳን ወዉስቴታ ጽላተ ኪዳን፡፲ቱ ቃላት እለ ተጽሕፋ በአፃብዒሁ ለእግዚአብሔር ቀዲሙ ዜነወነ በየዉጣ እንተ ይእቲ ቀዳሜ ስሙ ለመድኃኒነ ኢየሱስ ክርስቶስ ዘተሰብአ እምኔኪ ዘእንበለ ዉላጤ፡ወኮነ ዓራቄ ለሐዲስ ኪዳን፡ በዉኂዘ ደሙ ቅዱስ አንጽሖሙ ለማሃይማን ወለሕዝብ ንጹሐን፡ ሰአሊ ለነ ቅድስት።
    ወበእንተዝ ናዐብየኪ ኩልነ፡ ኦ እግእዝእትነ ወላዲተ አምላክ ንጽሕት ኩሎ ጊዜ ንስእል ወናን ቀዐዱ ኅቤኪ፡ ከመ ንርክብ ሣህለ በኅበ መፍቀሬ ሰብእ።
ታቦት በወርቅ ልቡጥ እምኩለሄ ዘግቡር እምዕፅ ዘኢይትቅዝ ይትሜሰል ለነ ዘእግዚአብሔር ቃለ ዘኮነ ሰብአ ዘእንበለ ፍልጠት ወኢዉላጤ፡ መለኮት ንጹሕ ዘአልቦ ሙስና ዘዕሩይ ምስለ አብ ወቦቱ አብሠራ ለንጽሕት፡ ዘእንበለ ዘርእ ኮነ ከማነ በኪነ ጥበቡ ቅዱስ፡ ዘተሰብአ እምነኪ ዘንበለ ርኩስ፡ ደመረ መለኮቶ፡ ሰአሊ ለነ ቅድስት።
   መቅደስ ዘይኬልልዋ ኪሩቤል እለ ሥዑላን በሥዕለ እግዚአብሔር፡ ቃል ዘተሰብአ እምኔኪ ኦ ንጽህት ዘእንበለ ዉላጤ ኮነ ሠራዮ ኃጥአትነ ወደ ምሳሴ አበሳነ፡ ሰአሊ ለነ ቅድስት።
   አንቲ ዉእቱ መሶበ ወርቅ ንጹሕ እንተ ዉስቴታ መና ኅቡእ፡ ኅብስት ዘወረደ እምሰማያት ወሀቤ ሕይወት ለኩሉ ዓለም፡ ሰአሊ ለነ ቅድስት።
   እንቲ ዉእቱ ተቅዋም ዘወርቅ እንተ ፆርኪ ማኅቶተ ፀዳል ኩሎ ጊዜ፡ ዘዉእቱ ብርሃኑ ለዓለም፡ ብርሃን ዘእምብርሃን ዘአልቦ ጥንት፡ አምላክ ዘእምአምላክ ዘበአማን፡ ዘተሰብአ እምኔኪ ዘእንበለ ዉላጤ፡ ወበምጽአቱ አብርሃ ላዕሌነ ለእለ ንነብር ዉስተ ጽልመት ወጽላሎተ ሞት፡ ወአርአትዐ እገሪነ ዉስተ ፍኖተ ሰላም በምሥጢረ ጥበቡ ቅዱስ፡ ሰአሊ ለነ ቅድስት።
   አንቲ ዉእቱ ማዕጠንት ዘወርቅ፡ እንተ ፆርኪ ፍሕመ እሳት፡ ብሩክ ዘነሥአ እመቅደስ ዘይሠሪ ኃጢአተ ወይደመሰስ ጌጋየ፡ ዝ ዉእቱ ዘእግዚአብሔር ቃል ዘተሰብአ እምነኪ ዘአዕረገ ለአቡሁ ርእሶ ዕጣነ ወመሥዋዕተ ሥሙረ፡ ሰአሊ ለነ ቅድስት።
ተፈሥሒ ኦ ማርያም ርግብ ሠናይት፡ ዘወለድኪ ለነ ዘእግዚአብሔር ቃለ፡ አንቲ ዉእቱ ጽጌ መዓዛ ሠናይ እንተ ሠረፀት እምሥርወ ዕሤይ፡ ሰአሊ ለነ ቅድስት።
በትረ አሮን እንተ ሠረፀት ዘኢንበለ ተክል ወኢሠቀይዋ ማየ፡ ከማሃ አንቲኒ ኦ ወላዲተ ክርስቶስ አምላክነ ዘበአማን ዘእንበለ ዘርእ መጽአ ወአድኅነነ፡ ሰአሊ ለነ ቅድስት።
   ለኪ ይደሉ ዘእምኩሎሙ ቅዱሳን ተስአሊ ለነ ኦ ምልእተ ጸጋ አንቲ ተዐብዮ እምሊቃነ ጳጳሳት ወፈድፍደ ትከብሪ እምነቢያት ብኪ ግርማ ራእይ ዘየዐቢ እምግርማ ሱራፌል ወኪሩቤል፡ አንቲ በአማን ምክሐ ዘመድነ ወሰአሊት ሕይወተ ለነፍሳቲነ ሰአሊ ለነ ኅበ እግዚእነ ወመድኃኒነ ኢየሱስ ክርስቶስ፡ ያፅንዐነ በርትዕት ሃይማኖት ዉስተ አሚነ ዚአሁ፡ ይጽግወነ ሣህሎ ወምሕረቶ፡ ይሥረይ ኃጢአተነ በብዝኅ ምሕረቱ፡ ሰአሊ ለነ ቅድስት።
ወብእንተዝ ናዓብየኪ ኩልነ ኦ እግዝእትነ ወላዲተ አምላክ ንጽሕት ኩሎ ጊዜ፡ ንስእል ወናን ቀዐዱ ኅቤኪ ከመ ንርከብ ሣህለ በኅበ ወፈቀሬ ስብእ።

ይዌድስዋ

ይዌድስዋ

ይዌድስዋ መላእክት ለማርያም በዉስተ ዉሥጤ መንጦላዕት፡ ወይብልዋ በሐኪ ማርያም ሐዳስዩ ጣዕዋ። 3x
ይቤላ መልአክ ለማርያም ተወከፊዮ ለቃል: ኅቤኪ ይመጽእ ወበማኅፀነ ዚአኪ የኅድር፡እፎ ቤተ ነዳይ ኅደረ ከመ ምስኪን እምሰማያት ወረደ ላዕሌሃ: ፈቲዎ ሥነ ዚአሃ ወተወልደ እምኔሃ።
ወበሳድስ ወርኅ ተፈነወ ገብርኤል መልአክ እምኅበ እግዚአብሔር ኅበ አሐቲ ሀገር ዘገሊላ እንተ ስማ ናዝሬት:ኅበ ድንግል እንተ ተፍኅረት ለብእሲ ዘስሙ ዮስፍ ዘእምቤተ ዳዊት፡ ወስማ ለይእቲ ድንግል ማርያም፡ቦአ መልአክ ኅቤሃ ወይቤላ ተፈሥሒ ፍሥሕት ኦ ምልእተ ጸጋ እግዚአብሔር ምስሌኪ፡ ቡርክት አንቲ እምአንስት: ወርእያ ደንገፀት እምቃሉ ወሐለየት ወትቤ፡ እፎኑ ከመዝኑ እንጋ አምኃ ይትአምኁ: ወይቤላ መልአክ ኢትፍርሂ ማርያም እስመ ረከብኪ ሞገሰ ብኅበ እግዚአብሔር: ወናሁ ትፀንሲ ወትወልዲ ወልደ ወትሰምዪዮ ስሞ ኢየሱስ: ዉእቱ ዐቢይ ወይሰመይ ወልደ እግዚአብሔር ልዑል። ወይሁቦ እግዚአብሔር አምላክ መንበረ ዳዊት አቡሁ።ወይነግሥ ለቤተ ያዕቆብ ለዓለም ወአልቦ ማኅለቅት ለመንግስቱ፡ ትቤሎ ማርያም ለመልአክ እፎኑ ይከዉነኒ ዘንቱ እንዘ ኢየአምር ብእሴ እፎኑ ይከዉነኒ፣ አዉሥአ መልአክ ሃቤኀ ወይቤላ መንፈሰ እግዚአብሔር ቅዱስ ይመጽእ ልዕሌኪ ወኃይለ ልዑል ይጸልለኪ፣ዘኒ ይትወለድ እምኔኪ ቅዱስ ዉእቱ ወይሰመይ ወልደ እግዚአብሔር ልዑል፡ ወናሁ ኤልሳቤጥኒ እንተ እምአዝማድኪ ይእቲኒ ፀንሰት: ወረከበት ወልደ በልኅቃቲሃ ወበርሥዐቲሃ ፡ ወናሁ ሳድስ ዝንቱ ወርኅ ለእንተ ይብልዋ መካን እስመ አልቦ ነገር ዘአይሰአኖ ለእግዚአብሔር፡ ትቤሎ ማርያም ለመልአክ ነየ አመቱ ለእግዚአ ኩሉ ነየ አመቱ።ይኩነኒ በከመ ትቤለኒ።
ይቤላ መልአክ ሰላም ለኪ፡    ይቤላ ገብርኤል ሰላም ለኪ፡ ማርያም ድንግል ሰላም ለኪ፡ ወላዲተ አምላክ ሰላም ለኪ፡ማርያም ቅድስት ሰላም ለኪ፡ ማርያም ዉድስት ሰላም ለኪ፡ ማርያም ፍሥሕት ሰላም ለኪ፡ ማርያም ብፅዕት ሰላም ለኪ፡ ማርያም ቡርክት ሰላም ለኪ፡ ማኅደረ መለኮት ሰላም ለኪ፡ ደብተራ ፍጽምት ሰላም ለኪ፡ እኅተ መላእክት ሰላም ለኪ፡
ወእመ ኩሉ ሕዝብ ሰላም ለኪ፡ እግዚእትነ ማርያም ሰላም ለኪ፡ ሰላማዊት ሰላም ለኪ፡ ቀደሰኪ ለማህደሩ ልዑል ሰላም ለኪ፡ አብደረኪ ወኀረየኪ ከመ ትኩኒዮ ማኅደሮ ሰላም ለኪ፡ በአልባሰ ወርቅ ዑፅፍት ወኁብርት ሰላም ለኪ።ክነፈ ርግብ በቡሩር ዘግቡር ሰላም ለኪ፡   ወገበዋቲሃኒ በሐመልማለ ወርቅ: ማርያም ሥርጉት ሰላም ለኪ፡ኆኅተ ምሥራቅ ወእሙ ለብርሃን ሰላም ለኪ፡ ትበርሂ እምፀሓይ ወትትሌዐሊ እምአድባር ሰላም ለኪ፡ማርያም ኅሪት ወክብርት ሰላም ለኪ፡
ሰአሊ ለነ ኀበ እግዚእነ ወመድኃኒነ ኢየሱስ ክርስቶስ፡ ከመ ያድኅነነ አመ ይመጽእ በስብሐተ አቡሁ ምስለ መላእክቲሁ ቅዱሳን፡ አመ ያቀዉም አባግዐ በየማኑ ወአጣሌ በጸጋሙ፡ ያቁመነ በየማኑ ምስለ እስጢፋኖስ ሰማዕት ወየዉሓንስ መጥመቅ።ወምስለ ኩሎሙ ቅዱሳን ወሰማዕት ለዓለመ ዓለም።