7 ጽብዒ ማርያም ለእለ ይጸብዑኒ በተሀብሎ፣
ወግፍኢ ካዕበ ለእለ ይገፍኡኒ ኲሎ፣
ተአምርኪ ታርኢ ወለወልድኪ በቀሎ፣
ይብል አብድ አኮኑ እግዚአብሔር ኢሀሎ፣
ሶበ ላጽሌሁ ፍጡነ ኢያርአየ ኃይሎ ።

8 ንዒ ማርያም ምስል ወልድኪ መዋኢ፣
ከመ ታወድቂ ፍጡነ ርእሰ ጸር ወጸላኢ፣
እስመ ፈታሒተ እንቲ ማዕከለ ግፉዕ ወገፋኢ፣
ብጹዕ ባሲ ድቀተ ጸሩ ዘይሬኢ፣
ወብጹእ ካእበ ፍትሐኪ ሰማኢ።
9 ዝ ውእቱ እድሜ ሣህልኪ ወዘተአምርኪ ጊዜ፣
ማርያም ድንግል ምልዕተ ምሕርተ ከመ ተከዜ፣
እስመ ማእዜኑ እሄሎ ማዕከለ ብካይ ወእንባዜ፣
ኦ ናዛዚት እተ ወለድኪ ናዛዜ፣
ኦ ንግሥት በቋኢት ብቊእኒ ይእዜ።

10 ሙሴ ነቢይ አመ ሕዝብሁ ቆስሉ፣
ተአምረ ገብረ ለአርዌ ብርት በምስሉ፣
እምዝኒ የዐቢ ኃይለ ተአምርኪ ንግሥተ ኲሎ፣
ወኀበ ተተክለ ለዋህድኪ መስቀሉ፣
ሠራዊተ ደዌ ወሞት ቀሪበ ኢይክሉ።

11 ፈሪሆትኪ ማርያም ቀዳሜ ኲሎ ተዐውቆ ፣
ወአፍቅሮትኪ ካዕበ መሠረተ ጥበብ ወአጠይቆ፣
ተአምርኪ እሴብሕ በቃለ መዝሙር ወመሰንቆ፣
በውስተ ተአምርኪ እግዝእትዬ ለዘአብአ ናፍቆ፣
አፍቲዎ መዋተ ወኢዖለ አጽሐቆ።

12 ምንተ ረከቡ ካህናተ ሀሊባ ወሐላ፣
መንክራተ አምላክ ዘርእዩ ምሰኪኖን እስከ ጌልጌላ፣
ካህናተ ቤተኪሰ ማርያም ርግበ ገሊላ፣
እንዘ ይትአምኑ ለተአምርኪ ኃይላ፣
ያፈልሱ ደብረ ወይመልሁ ሰግላ።

13 ይቴክዝ ዓብድ ሶበ ልበ ጥበብ ውህዶ፣
በኢያእምሮቱ እብዝኀ ሕማመ ዘይፈደፍዶ፣
ፍሡሕሰ ለፍቅርኪ ዘይጸምዶ ፣
በቅድመ ስዕልኪ እግዝእትዬ ለእለ ጊዜ ያነስእ እዶ፣
ተስፋሁ ይረክብ ወይፌጽም መፍቅዶ።
14 ዕቀብኒ በተአምርኪ ወእድኅንኒ እምማቴ፣
በከመ እድኅኖ ለወልድኪ ለዮናስ ወልደ አማቴ፣
መዋዕለ እረፍት አንቲ ማርያም ጰንጠቆስቴ፣
እምኃይለ ድካም ያጸንዕ መዋቴ፣
ኅብስት ስብሐትኪ ወፍቅርኪ ስቴ።
15 ሴስይኒ ማርያም ለጸማድኪ አሳብ፣
ኅብስተ አእምሮ ሰናየ ወወይነ ጥበብ ፣
እመኒ ፈድፋደ ኃጢኣትየ እምሕዝብ፣
ተዘከሪ እግዝእትዬ በርኅራኄኪ ዕጹብ፣
ከመ እስተይኪዮ ማየ ለጽሙእ ከልብ።
16 ኦ ፍጡነ ረድኤት ለጽኑዕ ወለድኩም፣
ወለነፍሰ ኩሉ ቃውም ፣
ጊዮርጊስ የዋህ እንበለ ምስፈርት ወአቅም፣
ከመ እግዝእትከ ቡርክት ማርያም፣
እስመ ርህሩሀነ ልብ አንተ እምበቀል ወቂም።
17 ኦ ፍጡነ ረድኤት ብብዙህ ጾታ፣
ከመ እግዝእትከ ርግበ ኤፍራታ፣
በሰማይ በላዕሉ ወበምድረ በታህታ፣
አምሕለከ ጊዮርጊስ በስመ እምከ ቴዎብስታ፣
ሞገሰ ስምከ ተሀበኒ ከመ ስምከ መንታ።
18 ኦ ፍጡነ ረድኤት እምሩጸተ ነፋስ ወዓውሎ፣
ለዘይጼውአክ በተወክሎ፣
ጊዮርጊስ ቅረብ ለምሕረት ወለተሣሕሎ፣
ተወከፍ ወትረ ጸሎትዬ ወቃለ ጽራህዬ ኲሎ፣
እስመ ልበ አምላክ ርኅሩኅ በኀቤከ ሀሎ።
19 አፍጣኒተ ረድዔት ማርያም በጊዜ ምንዳቤ ወአዓጸባ፣
ለዐይን እምቀራንባ፣
አንቲ ውእቱ ረዳኢተ ያጽቆብ በቤተ ላባ፣
በኲሎ ኅሊናሃ ወበ ኲሎ አልባባ፣
ለዘኢትአፈቅረኪ ነፍስ ትሠሮ እምሕዝባ።

20 ለዘኢያፈቅረኪ እግዝእትዬ ማርያም ወኩፈ ኢይኩን ጸሎቱ፣
ይትገዘም ኑኃ ዓመቱ ወኢይጥፋእ በከንቱ ፣
በአፈ መላእክት ወሰብእ ይትረገም ለእለዕለቱ፣
ዘአስተማሰሎ በትውኔት በማኅሌት ስምኪ ዝንቱ፣
ጌጋዩ ወኃጢኣቱ ኢይትኃድግ ሎቱ።
21 እሰግድ ቅድመ ማርያም ለዝክረ ስምኪ በጽዋዔ፣
ወእሰግድ ካዕበ ልድንግልናኪ ክልዔ፣
ወእስግድ ሥልሰ ለሥዕልኪ ቅድመ ጉባዔ፣
ዘኢሰገደሰ ለስዕልኪ እስሪፆ እምማዔ፣
በሥጋሁ ወበነፍሱ ኢይርከብ ትንሣዔ።